Apektado sa K to 12 patrabahuon sa DepEd

CEBU, Philippines – Patrabahuon sa pangpubliko’ng tunghaan kadto’ng mga magtutudlo sa pribado’ng unibersidad nga apektado sa K to 12 program.

Kini ang awhag ni Kong. Sherwin “WIN” Gatchalian sa Department of Education (DepEd) aron mapugngan ang paglarga ngadto sa gawas sa nasud sa mao’ng mga magtutudlo.

Gisugyot ni Gatchalian ang paggamit sa P10 bilyones nga pundo sa DepEd karong tuiga sa pagpatrabaho sa apektado’ng mga magtutudlo.

Gibanabana nga moabot sa 36,000 ka magtutudlo sa mga pribado’ng unibersidad sa nasud ang mawagtangan og trabaho nunot sa pagpatuman sa K to 12 program ug hayan manglarga sa gawas sa nasud.

Si Gatchalian kinsa sakop sa House committees on basic education and culture ug higher and technical education nibisita sa Sugbo aron pagtambong sa ika-15 nga National Convention of Lawyers.

Matud ni Gatchalian nga kung molarga gawas sa nasud ang hingtungdang mga magtutudlo, makadugang kini sa problema sa kakuwang sa mga hanas sa trabaho dinhi sa nasud.

Ang DepEd gikatakda nga mokuha og 39,066 ka bag-ong mga magtutudlo karong tuiga.

Gikataho nga 55,480 ka mga magtutudlo sa kolehiyo ang mawagtangan og trabaho nunot sa pagsulod sa una’ng hugna sa Grade 11 sunod tuig ug Grade 12 sa 2017 nga nagpasabot nga wala’y first year college sulod sa duha ka tuig ug sa ubang ang-ang hangtud mohuman sa senior high school ang mga tinun-an.

Gipaabot nga mobalik sa normal ang sitwasyon sa mga kolehiyo unya pa sa school year 2021-2022. (BANAT NEWS)