MMDA chairman suporta sa MCTMA
CEBU, Philippines – Gihangop ni Metro Manila Development Authority (MMDA) chairman Francis Tolentino ang lakang sa mga Sugbuanong magbabalaud sa pagtukod sa Metro Cebu Traffic Management Authority (MCTMA).
Si Tolentino nibisita sa Sugbo niadto’ng Sabado aron mamulong sa ika-15 nga National Convention of Lawyers.
“Dapat cohesive yu’ng Cebu and the adjoining cities and municipalities para isang plano lang for the entire Cebu Metropolitan area,” matud ni Tolentino.
Gipasalig ni Tolentino nga tabangan ang Metro Cebu dili lang sa pagsulbad sa problema sa trapiko kun dili lakip na sa ubang aspeto sa usa ka metropolitan area sama sa Metro Manila.
Diha’ng gipangutana kung mopapili ba siya sa pagka-senador aron makatabang sa Metro Cebu, si Tolentino nagkanayon nga mopahibawo ra siya sa tukma’ng panahon.
Apan sumala pa niya nga gi-endosar na siya sa mga opisyal sa iyang probinsiya sa Cavite lakip na sa iya’ng kontra sa politika nga mao ang banay’ng Remulla. “Eversince magkakalaban kami nang Remulla family, ngayon they expressed their support, we thank them,” matud ni Tolentino.
Si Kong. Gabriel Luis Quisumbing bag-ohay lang niduso sa House Bill No. 5556 nga magtukod sa MCTMA.
Niadto’ng 2013, si Kong. Raul del Mar niduso usab sa HB 372 nga magtukod sa Metro Cebu Traffic Authority nga karon anaa pa sa House Committee on Transportation. (BANAT NEWS)
- Latest
