Polis ug tanod apil sa drug test

CEBU, Philippines – Uyon ang kapulisan sa Sugbo sa pag-apil sa mga sakop niini nga ipa-ubos sa tinuig nga random drug testing apan kinahanglang sila maoy mopahigayon sa maong drug test.

Ang dakbayan adunay ordinansa nga nagmando sa pagpahigayon og drug-testing sa mga empleyado sa gobiyerno nga buot amendahan ug ipaapil na ang mga trabahante sa barangay ug mga polis sa siyudad. Si Konsehal Nestor Archival, Sr. sa nahauna mipadayag nga ang tumong sa pag-amendar sa ordinansa mao ang paghingusog sa kampanya batok illegal nga drugas.

Sa gipahigayong public hearing sa regular session niadtong Miyerkules, si Senior Superintendent Artemio Recabo, hepe sa Mobile Patrol Group nga maoy representante sa Cebu City Police Office mipadayag nga pabor sila sa pag-amendar sa ordinansa.

Matud niya nga ang drugas hulga sa komunidad diin mao kini ang usa sa mga rason nga dunay krimen.

Dugang pa niya nga nakadawat sila og mga report nga dunay mga polis nga tiggamitan usab niini.

Sa iyang bahin, ang hepe sa Cebu City Office on Substance Abuse Prevention (COSAP)  Dr. Alice Utlang buot nga ipapuno sa maong ordinansa nga  ipaagi usab og rehabilitation ang mga magpositibo sa drug test ug dili lang pasagdan.(May Miasco/EIM)

Gipatay sa drug pusher  di “asset” apan suspek  nadakpan sa cidg-7

Dili police asset sa kapulisan sa Police Station 8 o Talamban Police Station ang gipatay sa usa ka gipasanginlang drug pusher diha sa Highway 77, Barangay Talamban niadtong nakalabay nga adlaw.

Kini maoy giluwatan nga pamahayag sa hepe sa Talamban Police Station nga si Senior Inspector Bienvenido Miral nga nahinabi sa Banat News bahin sa pagkatawo ni Ronald Tejano, 43 anyos.

Kini human nga migawas sa imbestigasyon sa homicide section sa Cebu City Police Office nga asset sa kapulisan ang biktima, base sa pamahayag sa live-in partner sa namatay. Si Miral miingon nga wala sila makaila sa biktima ug wala ‘sab kini record sa ilang buhatan nga kini ilang impormante.

Niadtong Sabado sa alas-2 pasado sa hapon nasikop dayon sa mga sakop sa Criminal Investigation and Detection Group-7 ang suspetsado nga si Oliver Salazar diha sa Sitio Cabacayan, Barangay Pit-os.

Nakuha sa kapulisan gikan sa suspetsado ang usa ka .45 caliber pistola ug kini ipaubos sa ballistic examination, gipangita pa karon ang drayber sa motor nga si Mark Anthony Luchan. – /EIM) (BANAT NEWS)