‘Asset’ gipatay

CEBU, Philippines - Patay ang usa ka lalaki human nga gipusil makatulo ka higayon sa ilang silingan nga giingong tigpayuhot og ilegal nga drugas  kagahapon sa kaadlawon diha sa Hi-way 77, Barangay Talamban sa dakbayan sa Sugbo.

Ang namatay naila nga si Ronald Tejano, 43, samtang ang gitudlo nga nagpusil kaniya mao si Oliver Salazar. Base sa imbestigasyon sa Homicide Section sa Cebu City Police Office nga ang biktima kuyog sa iyang kapuyo nga si Lelani Laresma naglakaw padulong sa ilang balay.

Nasugatan sa duha ang suspek ug mitimbaya pa si Laresma sa suspek apan wala kini motingog, apan dihang misaylo na sila kalit lang mibunot og armas ang suspek ug gipusil ang biktima sa tulo ka higayon.

Matud pa nga nagpakiluoy si Laresma nga dili lang patyon ang biktima apan ang suspek wa g’yud manumbaling niini. Nakaangkon og samad sa walang bahin sa iyang lawas, sa buko-buko ug sa luyo nga bahin sa iyang ulo hinungdan sa iyang hinanali nga kamatayon.

Ang suspek dali nga mipasirit og padagan sakay sa usa ka motor nga gimaneho ni Mark Anthony Luchan palayo sa crime scene.

Dihang naabot ang mga sakop sa Emergency Rescue Unit Foundation (ERUF) pinangulohan ni Astrid Abellanosa wala na magginhawa ang biktima.

Nakarekober ang mga sakop sa Crime Scene Investigation Unit og tulo ka kabhang sa kalibre .45 nga bala diha sa crime scen.

Samtang ang motor nga gidala sa suspek narekober sa kapolisan nga gibiyaan duol sa balay ni Luchan ug gikustodiya na karon sa kapolisan sa Talamban. Nasuta nga ang biktima gidunggab sa suspek niadtong Marso 6 ning bulana tungod kay gidudahan kini nga maoy tigsumbong sa kapolisan sa pagpamaligya niini og shabu sa lugar.

Padayon pa karon ang pagpangita sa kapolisan sa suspek ug sa drayber sa getaway motorcycle.  (BANAT NEWS)