Hepe sa talisay giimbestigar

CEBU, Philippines - Nag-atubang og imbestigasyon ang hepe sa Talisay City Police Station, Supt. Reycel Carmelo Dayon gumikan sa kapakyas sa pag-report sa Police Regional Police-7 sa gipamusil nga mga langyaw sa usa ka food chain.

Matud ni Sr. Supt. Rey Lyndon Lawas, hepe sa Regional Investigation and Detection Management Division-7, nga si Dayon nakalapas sa sistema sa kapolisan nga nagmando sa tanan nga police commanders nga automatic nga mohatag og report sa “significant event” nga nahitabo sa ilang lugar.

“Accordingly, there was some failure to relay the information to the right hierarchy in the region. May mga proseso kasi kami,” sumala pa ni Lawas.

Dugang pa nga si Dayon nakapahibawo sa Provincial Tactical Operations Center apan pakyas sa pagpahibawo sa PRO-7.

Ang kapakyas sa pagtuman sa maong palisiya ang posible’ng hinungdan nga marelibohan si Dayon.

Si Lawas nidugang nga nakahatag na og tubag si Dayon diin ila na sab gi-finalized ang ilang imbestigasyon ug posible’ng mahibaw-an sunod semana.

Si Dayon niangkon nga napakyas sa pagtuman sa maong palisiya gumikan sa ka-busy niadto’ng panahona.

Andam hinuon si Dayon nga modawat kung siya relibohan sa hepe sa dakbayan sa Bogo, Supt. Hermano Mallari, nga maoy iya’ng nadungog nga mohulip kaniya.

Karong Marso 27 motangkod na og usa ka tuig nga hepe sa kapolisan sa dakbayan sa Talisay si Dayon. (Jojo C. Ugdol/GMR)(BANAT NEWS)