Hubog natagak sa pangpang patay

CEBU, Philippines - Patay ang usa ka lalaki nga hubog human nahulog sa pangpang dihang paingon unta nga motubag sa sugo sa lawas diha sa Sitio Catang, Barangay Aguswao lungsod sa Catmon.

Ang namatay naila nga si Reynald Rule, 41, nagpuyo sa maong lugar.

Matud pa ni Senior Police Officer2 Januario Sudaria ang imbestigador sa Catmon Police nga nahinabi sa Banat News hubog nga nauli sa ilang balay si Rule diin miadto kini sa dapit nga pangpang kay motubag sa sugo sa lawas.

Apan pipila ka oras na lang ang milabay wala pa gihapon kini nabalik hinungdan nga giapas kini sa iyang asawa nga si Rolanda ug iya na lang nakita nga atoa na sa ubos nga bahin sa pangpang ang iyang bana ug wala na maglihok.

Gituohan sa kapulisan nga nabunal sa bato ang ulo tungod sa grabeng kadaot sa ulo niini ug maoy hinungdan sa iyang kamatayon.

“Sa bukid man gud usahay didto sa pangpang kay hayahay dala magpahangin ba ini’g tubag sa sugo sa lawas, agi sa kahubog nahulog siguro to siya,” matud pa ni Sudaria. (Jojo C. Ugdol/EIM)(BANAT NEWS)