P11M Ukay-ukay

CEBU, Philippines - Dili mominus P11 milyones nga kantidad sa ukay-ukay ang gisakmit sa mga sakop sa National Bureau of Investigation(NBI)-7  gikan sa usa ka bodega sa Barangay Paknaan, siyudad sa Mandaue.

Ang maong pagpangronda gihimo pinasikad sa search warrant nga giluwatan ni Mandaue Municipal Trial Court in Cities (MTCC) Branch 1 Judge Rogelio Lucmayon.

Ang Assistant Regional Director sa NBI-7 Atty. Augusto Eric Isidoro  maoy nangulo sa maong operasyon.

Nasayran nga gawas sa mga ukay-ukay sulod sa bodega duna pay laing mga sinakong ukay-ukay ang nakompiskar nga padulong na unta ihabwa gikan sa usa ka container van ug mini dump truck.

Matud ni Isidoro, gidili ang pag-import sa maong mga ukay-ukay tungod kay gawas nga makadaot kini sa panglawas gumikan sa kemikal nga ibutang tinguha usab sa mga otoridad nga mahibalik ang dignidad sa mga Filipino tungod kay dili labayanan og mga basura ang Pilipinas.

Base sa impormasyon nga nakuha sa NBI giingong mga Koryano ang nag-import sa maong mga ukay-ukay  nga gipaagi una sa Cagayan de Oro City sa dili pa dad-on dinhi sa Sugbo.

Miabot og 400 ka bandol nga sinina ug 150 ka bandol nga sapatos ang nakuha nga giingong ibaligya og P20 mil matag usa.

Nasikop sa mga tinugyanan sa balaod ang subject sa search warrant ug giingong manager sa Mandaue Warehouse Park nga si Cecil Belocur ug ang usa ka Koryano nga si Jonghoi Goo nga giingong usa sa mga tag-iya sa warehouse.

Si Jonghoi  dihang nahinabi sa Banat News miingon nga igo lang siya nitabang sa maong negosyo sama sa pagbantay ug paghatud. Samtang si Belocura nagdumili pagluwat og pamahayag.

Ang duha pasakaan og kasong kalapasan sa Republic Act 4653 kon hugot nga pagdili sa mga commercial importation sa mga textile articles nga ukay-ukay. (BANAT NEWS)