Army recruitment padayon

CEBU, Philippines - Padayon ang pagdawat sa mga aplikante nga gusto’ng mahimo’ng sundawo ug ang eksaminasyon ipahigayun karong Sabado.

Kini ang gipahibawo sa kadagkuan sa 3rd Army Training Group nga nagbase sa Camp Lapu-Lapu sa Lahug, dakbayan sa Sugbo.

Ang aplikasyon bukas niadto’ng gusto’ng mamahimo’ng opisyal o ba kaha mag-sundawo pinaagi sa Probationary Officer Training Course ug sa Candidate Soldier Training Course.

Ang mga aplikante matud ni Lt. Col. Alex Aduca, commander sa 3rd ATG, sa CSTC kinahanglan nga usa ka college graduate ug kinahanglan nga wala pa’y anak.

Samtang sa gusto’ng magsundawo kinahanglan nga gradwado sa high school o kaha gradwado sa vocational nga kurso.

Kinahanglan lang magdala og birth certificate nga authenticated sa National Statistics Office nga karon Philippine Statistics Authority na, transcript of records ug college diploma  alang niadto’ng gusto’ng mag-opisyal.

Samtang kinahanglan lang magdala og card sa eskwelahan o Form 137, high school diploma ug valid identification cards ang ganahan nga mag-sundawo.

Mamahimo sab nga motawag sa Army Recruitment Center sa 232-2468 local 3610 ang mga interesado. (BANAT NEWS)