Kay wa pirmahe ang clearance, duha ka mag-agaw naghikog

CEBU, Philippines  – Duha ka mga 15-anyos nga mag-agaw ang gihaya karon didto sa Sitio Mahayahay Barangay Poblacion lungsod sa Daanbantayan human nga nagsunod sa paghikog gumikan kay wa pirmahi sa usa ka maestra ang ilang mga clearance diha sa Daanbantayan National High School.

Una nga naghikog niadtong adlaw nga Lunes ang 15-anyos babayeng tinun-an sa 3rd year high school ug pagkasunod adlaw (Martes) nakita ang iyang 15-anyos usab nga ig-agaw nga lalaki nga nagbitay na sa punoan sa kahoy 100 metros gikan sa haya.

Matud pa ni PO3 Victor Avenido sa Daanbantayan Police nga nahinabi sa Banat News base sa ilang imbestigasyon nangluod ang duha tungod kay wa pirmahe ang ilang clearance sa usa nila ka maestra (pangalan gipugngan sa Banat News).

Sumala pa nga ang maong clearance maoy paagi nila aron unta makakuha og final examinations.

Matud pa gikasab-an sa amahan ang unang naghikog tungod niini ug mi-post kini sa facebook account sa iyang classmate nga nanamilit.

Ang classmate sa dalagita daling mitaho sa ilang adviser kinsa daling mipasusi sa balay niini tungod kay mi-absent ang bata ug diha na lang nadiskubrehan nga nagbitay na kini sa iyang lawak ug patay na.

Niana  gihapong adlawa, ang ig-agaw nga lalaki gikatahong nadunggan kining militok diha sa haya sa ig-agaw nga “puslan mang dili na kini makakuha og eksaminasyon kay wa sad pirmahe iyang clearance mas maayo pang maghikog.”

Wa magdahom ang mga kabanay nga tinud-on kini sa binatilyo ug nianang pagkagabii nananghid kining dunay adtuon apan nabuntagan na lang wala na kini mauli ug sa ilang pagpangita  nakit-an kining patay na ug nagbitay sa punoan sa Sambag di layo sa ilang balay.

“Posible g’yud nga naimpluwensyahan ‘to siya sa iyang ig-agaw kay parehas ra man sila og problema, clearance ra g’yud ‘tawon ang nakaingon sa ilang paghikog,” matud pa ni Avenido.

Nasayran nga ang maong maestra naputos karon og pagsaway diha sa facebook ug uban pang social networking sites tungod sa nahitabo sa duha ka tinun-an. – /EIM) (BANAT NEWS)