Mga election officers gikotahan
CEBU, Philippines – Gikotahan sa Commission on Elections ang mga election officers nga kinahanglan nga dili molabaw sa singko porsyento sa ilang mga botante ang wala pa’y biometrics hangtud tapos ni’ng tuiga.
Niadto’ng buwan sa Enero, 17 ka election officers sa probinsiya sa Sugbo ang napadad-an og memorandum. Gipasabot ni Provincial Election Supervisor, Atty. Lionel Marco Castillano, nga kun molabaw pa sa singko porsyento sa mga botante sa matag lugar ang wala’y biometrics sa deadline, hatagan sila og hagbong nga performance rating report ang mga EOs ug dili makadawat sa ilang performance bonus. Ang mga lugar nga gipadad-an og memorandum mao ang isla sa Bantayan, Bogo City, Borbon, Carcar City, Catmon, Madridejos, Mandaue City, Medellin, Minglanilla, Naga City ug lungsod sa Oslob.
Lakip usab sa gipahimangnoan ang mga EOs sa lungsod sa Poro, San Francisco, Sibonga, Talisay City, Toledo City ug lungsod sa Tudela.
Ang lungsod sa Sibonga adunay daku pa nga trabaho-onon kay duna pa’y kapin sa 20 porsyento sa mga botante ang wala pa’y biometrics.
Sa pagkakaron aduna pa’y 173, 077 sa kapin 2.4 milyones ka mga botante sa Sugbo ang wala pa’y biometrics.
Karong Oktubre 31 ang katapusang pagpanawat sa COMELEC sa mga botante’ng magpa-biometrics. – /GMR) (BANAT NEWS)
- Latest
