MCPO-Team task force hulmahon

CEBU, Philippines – Gitinguha sa kagamhanan sa dakbayan sa Mandaue ang pag-umol og task force nga langkuban sa kapolisan sa Mandaue City Police Office (MCPO) ug mga traffic enforcers alang sa pagpahapsay sa kadalanan.

Si Mayor Jonas Cortes niingon nga kinahanglan kaayo karong panahona ang team up sa kapolisan ug mga traffic enforcers sa dakbayan sa higayun nga makabaton na og temporary operator’s permit (TOP) nga daku og ikatabang sa pagdisiplina sa badlungon nga mga drayber.

Matud ni Cortes nga gaan lang kaayo ang silot sa mga drayber nga madakpan sa kalapasan sa trapiko sanglit citation ticket lang ang i-isyu sa mga sakop sa Traffic Enforcement Agency of Mandaue nga may multa lang nga P200.

Si Cortes niingon nga may mga polis na nga ni-apply nga mahimo’ng deputized agent sa Land Transportation Office.

Gipasalig ni Mandaue City LTO chief Eugene Gador sa paghimo og follow-up sa maong mga application. – /GMR) (BANAT NEWS)