Armas mitakdo sa gigamit pagpatay sa anak sa polis

CEBU, Philippines –  Ang armas nga gigamit pagpatay sa anak sa usa ka police official sayo niining tuiga.

Kini maoy gibutyag ni Superintendent Romeo Santander, hepe sa City Intelligence Branch sa Cebu City Police Office.

Sumala pa nga ang armas nga gigamit ni Atong nga narekober sa kapulisan human sa pinusilay mao ang gigamit sa pagpusil patay kang Jayford Romanillos niadtong Enero 11 ning tuiga.

Si Romanillos anak ni Senior Inspector Samuel Romanillos nga kanhi hepe sa Compostela Police ug kasamtangan nga nadestino sa Cebu Provincial Police Office.

Kini ang migawas sa inisyal nga resulta sa gihimong ballistic examination sa PNP Crime Laboratory sa armas ni Atong. Si Santander miingon nga ang maong resulta sa eksaminasyon mamahimo kini nga basihan sa pagpasaka og dugang kaso ni Atong.

Ang anak ni Romanillos nga si Jayford gipusil patay diha sa barangay Inayawan kaniadtong Enero 11 niining tuiga.

Sa laing bahin, gibisita sa hepe sa Police Regional Office-7 ang duha ka mga polis nga sakop sa City Intelligence Branch nga naangol sa nahitabong pinusilay tali sa mga sakop sa gang sa maong lugar.

Gibisita ni Chief Superintendent Prudencio “Tom” Bañas ug mitunol kini sa “Medalya ng Sugatang Magiting” ngadto  nila ni Senior Police Officer 2 Julieto Bequilla ug PO2 Phillip James Tanzan kagahapon sa buntag sulod sa usa ka pribadong tambalanan.

Gawas sa duha ka mga polis apil ‘sab sa naangol atol sa maong hitabo ang usa ka police informant ug  si Atong nga usa sa ilang gikaengkwentro.

Si Bañas midayeg sa gihimo sa duha ka mga polis ug misaad sa mas hugot pa nga suporta sa kapulisan batok sa mga badlongon. Samtang ang hepe sa CIB nga si Superintendent Romeo Santander nagpasalamat sab sa pasidungog nga nadawat sa iyang duha ka mga sakop. – /EIM) (BANAT NEWS)