Unom patay

CEBU, Philippines – Unom ka tawo ang patay sa lain na ‘sab nga aksidente diha sa South Road Properties (SRP) human usa ka Hyundai Sedan ang milupad sa center island ug mitabok sa pikas nga lane ug napasok sa usa ka trailer truck nga duna’y karga nga mga sinakong semento kagahapon sa kaadlawon.

Sa impormasyon nga gipaabot ni Joy Tumulak ang Operations Chief sa Cebu City Operations Traffic Management nga upat ang ‘dead on the spot’  samtang usa ang namatay sa tambalanan.

Giila ang mga namatay nga sila si Rustico Bas, 48, drayber ug tag iya sa sakyanan, Rosette Capala, 45,  ang mag-agaw nga sila si Alma Basalo, 45, Gwendolyn Basalo, 45, ug Oscar Oneo, 45, nga nakabsan sa iyang kinabuhi samtang gitabang sa Vicente Sotto Memorial Medical Center. Ang lima pulos taga Barangay Cansujong dakbayan sa Talisay. Samtang ang drayber sa trailer truck naila nga si Danilo Cojo, 48, nga taga dakbayan sa Naga.

Matud pa ni Tumulak nga posibling hubog ang drayber sa Sedan atol sa maong hitabo.

Sumala pa ni Tumulak nga gikan sa dakbayan sa Sugbo ang Sedan paingon sa Talisay City samtang ang trailer truck paingon unta sa pantalan sa dakbayan sa Sugbo.

Sumala pa ni Tumulak nawad-an og kontrol ang kotse ug mipaingon sa center island sa kalsada dayon milupad sa pikas nga dalan ug naatol nga maoy pag-agi sa trak ug didto kini misampak sa atubangan nga bahin niini. Gumikan sa kakusog sa bangga napasok ilawom sa truck ang kotse ug naglisod ang rescue team sa pag-ibot sa mga biktima.

Ang drayber sa trailer truck ang kasamtangan sab karon nga gitanggong sa karsel sa Parian Police Station alang sa posibleng ipasaka nga kaso. Nagpadayon pa ang imbestigasyon sa CITOM aron pagtino sa tinuoray nga nahitabo. Samtang sa dakbayan sa Naga, patay ang backrider sa usa ka motorsiklo ug angol ang drayber human sila nasaghiran sa usa ka Ceres Bus sa National Road sa Barangay Langtad.

Ang mga biktima naila nga sila si Carlos Tabay, 40 nga taga Barangay Labangon, Cebu City samtang ang namatay mao ang iyang kapuyo nga si Hegenea Gutierrez.

Ang drayber sa Ceres Bus nga si Maychael Aleonar, 29, nga taga Barangay Guadalupe dakbayan sa Carcar gitanggong na sa kapolisan.

Matud pa ni Police Officer 1 Lord Cañada nga nahinabi sa Banat News nagsubay ang duha sa parehong lane sanglit giayo ang pikas lane sa dalan, apan nag-ilog ang duha kinsay makauna ug dihang nakasud ang motor misud usab ang bus hinungdan nga misuway og hunong ang motor apan nawad-an kini og kontrol.

Nalabay ang angkas niini ug naguyod hangtud nga naligsan sa bus. Patay na si Gutierrez pag-abot sa South General Hospital. – /EIM) (BANAT NEWS)