Mobiya sa ginikanan silotan
CEBU, Philippines — Gisuportahan sa Provincial Board ang House Bill 5336 kon ang “Parents Welfare Act of 2014” nga magsilot sa mga anak nga moabandonar sa ilang mga ginikanan ilabi na kung tiguwang na.
Si Bokal Arleigh Sitoy ang nangamahan sa resolusyon sa pagsuporta sa maong balaudnon nga giduso ni Kongresista Roy Loyola sa Cavite.
Matud ni Sitoy nga ang pagpasar sa mao’ng balaudnon haum kaayo aron maseguro ang kaayuhan sa mga ginikanan lukop nasud.
Gitumbok ni Sitoy ang nalatid sa Section 16 sa Local Government Code of 1991 nga nagpalambo sa kaayuhan sa panglawas ug kaluwasan sa mga molupyo.
Kung mahimo’ng balaud, kadto’ng makalapas silotan sa pagkapriso gikan sa usa ngadto sa unom ka buwan o pabayron og P100,000 nga multa kung mahimo sa sunod-sunod nga tulo ka buwan padayun kini’ng molapas nga dili makatarunganon.
Kadto’ng mobilin sa ilang ginikanan sa usa ka lugar nga tinuyo silotan gikan sa unom ngadto sa 10 ka tuig ug pamultahon og P300,000. (BANAT NEWS)
- Latest
