Bata patay, 5 angol sa laing aksidente

CEBU, Philippines — Patay ang 6-anyos nga bata nga naligsan sa truck sa dakbayan sa Toledo alas 11:30 niadto’ng Biyernes sa gabii.

Ang biktima giila nga si Gambert Alfeche Rosalita, nagpuyo sa maong lugar samtang ang drayber sa truck giila nga si Ramon Ragas Villaro, 29, residente sa Tres D. Abril, Labangon, Cebu City.

Padulong sa Toledo ang truck diha’ng kalit nga nitabok ang biktima sa karsada.

Gidali pagdala sa tambalanan ang biktima apan gideklarar nga dead on arrival gumikan sa daghang samad sa ulo samtang nisurender sa kapolisan ang drayber sa Toledo City Police Station.

Samtang angol ang 4-anyos nga bata human nabanggai og motorsiklo alas 10 sa buntag sa maong adlaw sa barangay Tapon, Dumanjug.

Ang biktima giila nga si Steven Kim Sagayno, residente sa maong lugar samtang ang drayber sa motorsiklo giila nga si Francisco Dacay Quiñanola, hingkod ug residente sa pareho’ng lugar.

Matud pa nga kalit nitabok sa karsada ang biktima hinungdan nga nabanggaan ug nakaangkon og samad sa nagkalain-laing parte sa lawas ug gidala sa tambalanan samtang gitanggong sa kapolisan ang drayber.

Laing naangol ang 10-anyos nga tinun-an nga nilabang sa karsada duol sa eskwelahan sa barangay Don Gregorio Antigua sa lungsod sa Borbon sa niaging udto.

Naila ang angol nga si Franscine Mangubat samtang ang nakabangga naila nga si Marlon Monterola, 52, taga Labangon, Tabogon.

Padulong molabang ang bata sa karsada diha’ng nabanggaan sa motorsiklo ni Monterola hinungdan   nga natumba ug naangol ang mga sakay nga sila si Axiel Villanueva ug Mark Anthony Capisnon.

Gipangdala sa Juan Dosado Memorial Hospital ang mga angol. (Bryner L. Diaz, Raymond Abarcas ug NSU Interns Donahmae Gadugdug ug Julie Ann Dominguez/GMR)  (BANAT NEWS)