P1.8M danyos sa sunog
CEBU, Philippines — Naugdaw ang usa ka establisamento, upat ka balay, samtang upat ‘sab ang partially damaged sa sunog nga miigo sa Sitio Katambisan, Barangay Corazon sa lungsod sa Catmon kagahapon sa kaadlawon.
Ang naugdaw nga edipisyo may sulod nga lima ka stalls nga gipanag-iya nila ni Ruth Marie Fruta, Rene Colinares, Victor Nuñeza, Mona Climaco ug Linda Duran.
Lakip sa naugdaw mao ang upat ka balay nga gipanag-iya ni Peter Molihon, Rogelio Pontillas, Nicolas Fruta, Rasario Rolle lakip sab ang usa ka awto, motor ug tricycle.
Samtang ang silingan ‘sab niini nga upat ka stalls gipanag-iya nila ni Florante Rolle, Jose Villanueva, Apolinaria Orio, ang balay ni Renagen Matus nakan-an ‘sab sa kalayo.
Si Fire Officer 1 Ramuel Supieza, miingon nga ang alarma nadawat nila alas 2:20 sa kaadlawon ug dul-an sa usa ka oras nila kining gikombate hangtud nakontrolar alas 3:10.
Matud pa ni Supieza nga sa stall ni Ruth Marie Fruta nagsugod ang sunog tungod sa luag nga outlet nga gisaksakan sa refrigerator. Matud pa nga ni-spark ang maong outlet hinungdan sa pagkuyanap dayon sa kalayo.
Si Supieza midugang nga naglisod sila tungod kay hagip-ot ang dalan ug peligro nga makuryentihan ang mga bombero kung modiritso sila og pasirit kay wala pa napalong ang kuryente.
Mokabat og P1,847,000 ang danyos sa maong sunog sumala pa ni Supieza. (BANAT NEWS)
- Latest
