BIN nanion sa checkpoint gidakop
CEBU, Philippines - Gisikop sa mga polis ang sakop sa Barangay Intelligence Network (BIN) nga nanion og armas sa motorista sa usa ka checkpoint sa dalan Leyson, Talamban, dakbayan sa Sugbo alas 11 sa nakalabay nga gabii. Ang nadakpan naila nga si Jeneboy Balasabas, 32, may kapuyo nga taga Purok 5, barangay San Jose.
Samtang ang reklamante naila nga si Dean Mark Lape, 31, ulitawo nga taga dalan J. Bontuyan, Talamban.
Matud ni Sr. Insp. Bienvenido Miral, hepe sa Talamban Police, nga dugay na nga magkuyugan sa mga checkpoint ang maong BIN ug karon pa gireklamo.
Sumala pa ni Miral nga atol sa checkpoint, adunay nahitabo nga wala pagkasinabot tali sa reklamante ug sa nag-checkpoint nga mga polis ug kalit lang nibunot sa .38 revolver si Balasabas.
Nagtuo si Miral nga nahimo kadto sa BIN sanglit diha’y higayun sa ilang checkpoint nga hapit sila banggai sa usa ka motorista nga ila’ng gipara.
Hinuon giklaro ni Miral nga dili gyud pwede magdala og armas ang usa ka BIN labi na kung wala’y lisensya.
“Mangita pa ko og legal opinion ug unsa’y pwede ani nga kaso kay na-absorbed na man gud sa grave threats ang illegal possession. Amoa pa to gikontak ang reklamante kay naa na man gyu’y reklamo niya,” sigun pa ni Miral.
Dugang ni Miral nga daghan na niduol kaniya nga mga BIN nga nangutana kung dili ba diay siya makatabang kung sila masikop. Apan iyang gipasabot nga wala siya’y mahimo kung may kalapasan gyud nga nahimo. (Jojo C. Ugdol/GMR)(BANAT NEWS)
- Latest
