Mga bata maoy gidudahan pagkasunog sa trak

CEBU, Philippines - Mga bata maoy gitumbok nga maoy misunog sa mini-dumptruck atubangan sa Talisay City Police Station ug gikatakdang pasakaan og kaso ang ilang mga ginikanan.

Kini maoy gibutyag ni City Legal Officer Alfredo Sipalay atol sa pakighinabi sa mga tigbalita kagahapon.  Ang mga bata matud pa nag-edad og 10-anyos paubos ug gikostudiya na sa City Social Development Office.

"Ang mahitabo ani ‘ron kay minor man ang suspect ang mga ginikanan ani sa mga minor ang mag-atubang sa kaso," pasabot pa ni Sipalay. Sa iyang bahin, si Talisay City Mayor Johnny delos Reyes miklaro nga wala siya sa dapit atol sa pagkahitabo apan dunay mi-text kaniya bahin niini.

Sa balita sa Banat News kagahapon, wala maghisgot nga may kalambigitan ang mayor sa pagkasunog sa trak, kondili, gibase kini sa pamahayag ni Talisay City Fire Marshal Senior Inspector Randy Mendaros nga base sa ilang nakuhang impormasyon diha ang mayor ug maoy nibadlong sa mga nag-estambay nga mga bata. Ang report nag-ingon nga nakabiya na ang mayor dihang nahitabo ang sunog ug gidudahan ni Mendaros nga dunay upos sa sigarilyo nga posibleng nabilin sud sa trak hinungdan sa pagkasunog niini. (Renan Alangilan gikan sa The Freeman/EIM (BANAT NEWS)