Taxi driver nanion og kutsilyo kay di mosugot sa fare reduction
CEBU, Philippines – Gipanawagan sa Land Transportation Franchising and Regulatory Board (LTFRB)-7 ang mga sumasakay nga ireklamo g’yud sa ilang buhatan ang mga drayber sa taksi nga magmagahi pagtuman sa P30 nga flagdown rate.
Kini human dunay mga pasahero nga mireklamo nga wala tumana sa ubang taxi drivers ang kamandoan.
Gani duna pay insidente nga ang drayber sa taksi nanion og kutsilyo ug nanghulga pa sa kinabuhi sa pasahero nga miinsister sa bag-ong flagdown rate.
Duna nay taxi driver ug operator nga naisyuhan og Inspection Report Summon (IRS) tungod sa maong reklamo. Ang OIC sa LTFRB-7 Reynaldo Elnar miklaro nga di rason ang “wala makahibalo sa bag-ong order” aron di mosunod sa fare reduction. Kadtong mga pasaherong dunay reklamo mahimong motawag sa hotline sa LTFRB 231-6221.
Kinahanglang makuha ang body number, o ba kaha plaka ug pangalan sa taksi ug ang oras nga nahitabo ang pagpanikas. Sa report sa Balitang Bisdak kagahapon, si Richard Cabucos, pangulo sa Metro Cebu Transport Operators Association (MCTOA) miduaw kagahapon sa LTFRB-7 ug mihangyo nga dili lang dayon panakpon o silotan ang mga drayber nga nakalapas niini.
Matud niya nga posibleng nabag-ohan lang ang mga drayber sa bag-ong kamandoan.
Ang mga drayber mireklamo karon tungod kay dakong bahin sa ilang kitaon ang mawala ug nadugangan pa g’yud tungod sa pagsaka sa presyo sa gasolina kagahapon nga miabot og P.95 kada litro. – /EIM) (BANAT NEWS)
- Latest
