Drugas nasakmit, 4 nadakpan
CEBU, Philippines – Gibanabana nga mokantidad sa P35,300 ang gituohang shabu nga nasakmit sa usa ka buy-bust operation sa City Intelligence Branch sa Quiot, dakbayan sa Sugbo diin upat ang nadakpan pasado alas 10 sa nakalabay nga gabii.
Ang mga nasikop naila nga sila si Ceasar Sabandija nga maoy target sa kapolisan, Adam Ybanez, Willie Bejec ug Alvaro Rosales, mga hingkod nga nagpuyo sa mao’ng lugar.
Matud ni Supt. Romeo Santander, hepe sa CIB, nga gamit ang P200 nga buy-bust money, nakapalit ang asset sa kapolisan og usa ka gamay nga pakete sa gituohang shabu nga gitunol sa suspek. Paghamag sa kapolisan nasikop ang mga kauban ni Sabandija sa sulod sa balay diin nag-pot session.
Nakuha gikan ni Sabandija ang 29 ka gagmay ug usa ka medium-sized nga pakete sa gituohang drugas, usa ka medium-sized ang nakuha gikan ni Ybanez samtang mga drug paraphernalia ang nakuha gikan nila ni Bejec ug Rosales.
Nakuha sab sa kapolisan ang salapi’ng cash kantidad og P1, 620 nga gituohang kinitaan sa ilegal nga negosyo ni Sabandija.
Gitanggong na sa Cebu City Police Office detention cell ang upat ka suspek nga gikatakda’ng pasakaan og kaso. – /GMR) (BANAT NEWS)
- Latest
