Polis nga nakapusil og drug suspect mitahan

CEBU, Philippines – Boluntaryo nga mitahan sa Criminal Investigation and Detection Group-7 ang usa ka polis nga sakop sa Special Weapons and Tactics (SWAT) team sa Cebu City Police Office human kini nalutsan og warrant of arrest tungod sa pagkapusil niya ug napatay ang usa ka gipasanginlang drug personality sa Bohol niadtong nakalabay nga tuig.

Kagahapon sa buntag mitahan sa buhatan sa CIDG-7 si PO3 Edcel Petecio uban ang iyang abogado nga si Atty. Pedro Leslie Salva.

Si Petecio miingon nga isip usa ka tigpatuman sa balaod   boluntaryo   siyang mitahan human kini nasayod nga duna kini warrant of arrest sa kaso’ng homicide.

Ang maong warrant giisyu ni RTC Judge Jennifer Marcos sa Branch 2 sa siyudad sa Tagbilaran niadtong Pebrero 28, 2015.

“In good faith as law enforcer, naa man ta’y warrant atong atubangon,” matud pa ni Petecio.

Matud pa ni Petecio nga ang maong warrant naggumikan sa kamatayon ni Vernard Tadena niadtong Oktubre 18, 2014 didto sa Barangay Badiang, Inabangga, Bohol human kini mitambong og vigil sa namatay niya nga paryente. Sumala pa niini nga sa pag-abot niya sa balay sa iyang paryente iyang nadungog ang singgit sa pikas balay nga “bantay kay naa si Edcel” mao nga naalarma siya.

Sa iyang pagsubay sa maong balay iyang nakita nga nagdinaganay ang mga tawo ug duna’y natanggong sa sulod apan sa iyang pagduol iyang nakita si Tadena nga dunay dala nga armas.

Sigun pa niya giunhan siya pagpusil ni Tadena apan wala makabuto ang improvised nga armas ni Tadena hinungdan nga kini dali ‘sab  siya nga mibunot sa iyang armas ug gipusil niya si Tadena sa paa.

Apan duna pa diay laing dala nga .38 revolver si Tadena ug kini iyang gigamit na ‘sab sa pagpusil sa polis apan wala gihapon nakabuto diin dali sab nga nakapasalipod si Petecio ug mipusil ni Tadena igo sa iyang papangig hinungdan nga kini namatay. Sa crime scene narekober sa kapulisan ang usa ka .38 revolver  duna’y lima ka mga bala nga wala nakabuto, usa ka pakete sa gituohang shabu, 34 ka wala’y sulod nga pakete ug drug paraphernalia.

Ang abogado sa polis nga si Salva miingon nga ang iyang kliyente igo lang mihimo sa angay nga buhaton gawas sa pagdepensa sa iyang kaugalingon.  Si Petecio nadestino sa SWAT team sa CCPO sulod na sa lima ka tuig. – /EIM) (BANAT NEWS)