Pustahanay sa kaka, usa nadakpan

CEBU, Philippines- Nadakpan ang usa ka tawo nga wala nakadagan dihang kalit lang gironda sa kapolisan ang nagpustahanay sa gipaaway nga kaka sa Sitio Camolinas, Poblacion, lungsod sa Cordova alas 9 pasado ang takna sa niaging gabii.

Si Senior Police Officer 1 Laurencio Wagwag sa Cordova Police Station niila sa nadakpan nga si Roque Tahanlangit, 39, nagpuyo sa maong dapit.

Matud ni Wagwag nga gireklamo na sa mga nagpuyo sa maong dapit ang panagtapok sa mga lalaki panahon sa gabii tungod sa kasaba sama sa buwangan sa manok nga magmasyada sa dili pa magsugod ang paaway sa kaka.

Mosamot pa ang kasaba sa higayun nga magsugod na ang pagbugno sa duha ka kaka nga makatugaw sa pagkatulog sa mga molupyo.

Si Wagwag niingon nga ila na nga gibadlong ang grupo apan wala nanumbaling hinungdan nga gihimo ang pagronda.

Si Tahanlangit nga maoy naggunit sa roydahan uban sa gipaaway nga duha ka kaka ang wala dayun nakadagan hinungdan nga nagunitan sa kapolisan ug nadakpan.

Nakuha gikan kang Tahanlangit ang usa ka roydahan sa gipaaway nga duha ka kaka ug pipila ka posporo nga gisudlan sa nagkadaiyang matang sa kaka. (BANAT NEWS)