Forest fire gibantayan

CEBU, Philippines - Ang Department of Environment and Natural Resources -7 subsob nga nangandam aron protektaran ang mga plantasyon niini sa mga kahoy nunot niining pagsulod na sa ting-init.

Ang tigpamaba sa DENR-7 Eddie Llamedo miingon nga gitutokan nila karon ang ilang National Greening Program ilabi na sa mga hot spot areas.

Ang mga hot spot areas nga dunay plantasyon sa DENR nahimutang sa amihanang bahin sa Bohol, habagatang bahin sa Sugbo gikan sa lungsod sa Argao ug Oslob,ug sa Negros Oriental.

Sigon pa ni Llamedo ang mga nahisgutang hotspot areas maoy pinakadako nga plantasyon sa NGP sa DENR. Nabalaka sila nga dunay mahitabong forest fire o sunog sa kalasangan ug mapunta na hinuon sa wala ang minilyon nga salapi nga gigasto sa gobiyerno.

Ang DENR adunay gipang-deploy nga mga motorsiklo alang sa mga forest rangers nga magbantay sa kalasangan, lakip sa gipamutang mao ang pundo nga tubig aron dunay magamit pagpawong sa kalayo kun dunay mahitabong sunog.

Niadtong nakalabay nga tuig, 20 ka ektaryang kakahoyan sa DENR ang nasunog tungod gihapon sa kainit sa panahon. Nanawagan ang DENR sa publiko nga motabang pagprotihir sa kalasangan ug likayan ang pagduslit og kalayo sa kalasangan kun sila mabisita sa maong mga dapit.

Ang NGP usa ka programa sa administrasyong Aquino nga nagtinguhang mananom og 1.5 bilyon ka mga kahoy sa tibuok nasud tungod sa Climate Change.  (BANAT NEWS)