Economic zone, mga proyekto giduso sa PDC

CEBU, Philippines - Nagtinguha ang kagamhanan sa probinsiya sa Sugbo nga ipaubos sa feasibility study ang 550 ektarya nga luna sa habagatang bahin sa probinsiya nga posible’ng himuong economic zone.

Ang 40 ektarya sa luna igahin alang sa katukuran sa international port. Ang giplanohan nga economic zone sa probinsiya langkuban sa 218 ektarya’ng industrial, 209 ektarya sa commercial district, 55 ektarya nga Ocean Park ug 13 ektarya ang pro-biotic demo farm.

Ang Provincial Development Council (PDC) niduso og sugyot kabahin sa maong plano ngadto sa Regional Development Council-7.

Ang mga lugar nga maglangkub sa economic zone mao ang lungsod sa Minglanilla ug mga dakbayan sa Talisay ug Naga.

Ang maong proyekto maglangkub usab sa 100 ektarya’ng reclamation project sa lungsod sa Minglanilla.

Sa laing bahin, ang PDC niduso usab sa nagkalain-laing proyekto sa kalungsuran.

Lakip niini ang pagpasemento sa karsada sa lungsod sa Sibonga, kaugmaran sa eco-sports complex, reclamation project ug community buildings nga nagkinahanglan og P46 milyones.

Ang lungsod sa Dalaguete niduso  og P57.4 milyones proyekto alang sa  inprastraktura, social programs ug pagpamalit og garbage trucks.

Ang lungsod sa Moalboal ug Sogod niduso sa waterworks system nga mokabat ngadto sa P30 milyones ug 22.680 milyones.

Ang PDC niduso usab sa katukuran sa eco-park ug visitor’s center sa barangay San Sebastian sa lungsod sa Samboan sa kantidad nga P10 milyones ug barangay roads nga nagkinahanglan og P5 milyones nga budget.

Ang lungsod sa Catmon niduso sa pagpaayo sa ilang farm-to-market road (FMR), pagpaayo sa merkado publiko, katukuran sa waterworks, motorpool, abattoir ug pagpamalit og ambulansiya diin nagkinahanglan og P72 milyones.

Ang lungsod sa Pilar niduso sa unom ka FMR nga nagkinahanglan og P48 milyones nga budget.  (BANAT NEWS)