Trapik molungtad pa tapos sa marso

CEBU, Philippines - Molungtad pa hangtud tapos bahin sa Marso ang nasinati nga kahuot sa mga sakyanan sa dakbayan sa Mandaue epekto sa pagsirado ug pagsemento sa dalan S. Osmeña sa dakbayan sa Sugbo.

Nunot niini, tinguha sa executive officer sa Traffic Enforcement Agency of Mandaue (TEAM), Edwin Ermac, sa pagpahigayun og laing coordination meeting sa mga opisyal sa Cebu City Traffic Operations Management (CITOM).

Tuyo niini nga ang pag-awhag sa pagbalik sa two-way access sa Ouano Avenue nga gisirado sa pagkakaron.

Gitataw ni Ermac nga wala matuman ang original traffic rerouting  plan sa mga nagdumala sa trapiko sa kagamhanan sa dakbayan sa Sugbo hinungdan sa paghuot sa mga sakyanan sa dalan M. Logarta ug national highway sa A. Soriano Avenue nga nagsugod niadto’ng Marso 5 nga maoy pagsirado sa S. Osmeña.

Gitataw ni Ermac nga orihinal nga plano mao ang two-way access sa Ouano Avenue habig sa Mactan Channel. (BANAT NEWS)