Norwegian nanumbag, arabo nakuyapan

CEBU, Philippines - Gisikop sa kapolisan ang usa ka Norwegian human gisumbag ang usa ka Saudi Arabian sa nawong hinungdan nga nakuyapan diha’ng napantok ang ulo sa semento sa niaging kadlawon sa Mango Square.

Base sa taho nga si Knuf Foseide, 44, Norwegian, ug Abdulkader Mwaffaq Wazzan, 39, Arabo, nagkalalis hinungdan nga gisumbag ang Arabo.

Sa kakusog sa pagkahagba sa Arabo nakuyapan ug unconscious pa dihang gidala sa mga sakop sa Emergency Rescue Unit Foundation. Ang beat patrol sa Fuente Police Station nga nadestino sa maong lugar ang dali nga niresponde ug nanawag sa ERUF aron mahatud ang Arabo sa tambalanan.

Ang suspek nga si Foseide gisikop ug gipaubos sa alcohol test diin nasuta nga positibo hinungdan nga gitanggong sa Fuente Police Station tungod sa kaso’ng paghubog-hubog.  (BANAT NEWS)