Nasudla’g espiritu?

CEBU, Philippines - Gisuspenso ang klase sa Sudtonggan Elementary School (Sudtonggan Night High School) sa Sitio Sudtonggan, dakbayan sa Lapu-Lapu human 10 nila ka estudyante sa Grade 7 ang giingong   nasudlan og dautang espiritu sulod sa duha ka adlaw.

Si Eduardo Ompad, Schools Division Superintendent sa dakbayan nagkanayon nga nakahibalo sila sa maong panghitabo ug mipadala og DepEd staff aron mosusi niini ug mipatawag og general meeting karong hapon.

Patambungon ang mga magtutudlo ug mga ginikanan  ug sundan kini og Santos nga Misa.

Si Kapitan Isabelito Darnayla sa Barangay Basak, mibutyag nga niadtong Miyerkules sa gabii gikatahong unang nasudlan og “espiritu” ang duha ka lalaking estudyante ug nasundan og laing walo ka estudyanteng babaye sa pagka- Huwebes sa gabii.

Tulo sa walo ka estudyante ang giingong nag-wild, nagsiga ang mata ug nausab ang mga tingog.

Matud pa nga duha ka bata usab ang gisudlan og espiritu sa usa ka babaye nga nagsige og pangutana: “ngano gi-guba ninyo ang among balay?”

Ang tulo kanila gidala sa Our Lady of Sacred Heart Parish samtang naulian usab dayon ang lima. Matud pa nahuwasan ang tulo human gisabliga’g benditadong tubig ug naglitok og pag-ampo ang mga magtutudlo ug mga estudyante.

Sumala pa nga dunay karaang atabay sa luyo sa eskuylahan nga gitam-okan na og basura  ug gipamutol usab ang mga punoan sa kahoy sa maong dapit. Giingong kaniadto adunay tulo ka tawo nga gipanglubong sa maong dapit.

Wa pay pamahayag nga giluwatan ang simbahan bahin sa insidente atol ning pagsulat sa balita. (Christell Fatima Tudtud/EIM)(BANAT NEWS)