Epekto sa pagsirado sa S. Osmeña abot sa Mandaue

CEBU, Philippines - Nakahatag gyud og daku’ng epekto sa dagan sa mga sakyanan sa dakbayan sa Mandaue ang pagsirado sa mga dalan nga nagtadlas sa reclamation area, dakbayan sa Sugbo tungod sa pagsemento sa  dalan S. Osmeña sugod kagahapon.

Ang paghuot sa mga sakyanan nagsugod sa Highway Seno ug M.C. Briones hangtud na sa barangay Subangdaku ug North Bus Terminal sa habig sa dakbayan sa Mandaue.

Apektado usab ang Ouano ug A. Soriano Avenue sa reclamation area sanglit ang dalan M. Logarta lang ang bugtong kaagian padulong sa dakbayan sa Sugbo.

Ang mga sakyanan paingon sa amihana’ng bahin ug sa dakbayan sa Lapu-Lapu ang ikahinagbo sa mga sakyanan gikan sa dakbayan sa Mandaue nga nakaingon sa paghuot.

Si Roger Paller, information officer sa dakbayan sa Mandaue, niingon nga gihimo hinuon sa kagamhanan sa dakbayan sa Sugbo ang koordinasyon pinaagi sa pagpahibalo sa kagamhanan sa dakbayan sa Mandaue sa ilang pagsirado sa mga dalan sa reclamation area tungod sa pagsemento sa dalan S. Osmeña.

Matud ni Paller nga ang Traffic Enforcement Agency of Mandaue (TEAM) nga gipangulohan ni Edwin Ermac nagbutang og mga traffic enforcers sa mga dalan paingon sa dakbayan sa Sugbo sa paghatag og giya sa mga drayber sa mga dalan nga mahimo nila’ng kaagian.  (BANAT NEWS)