Fake sex pills

CEBU, Philippines - Tulo ka tindahan ang gironda sa mga sakop sa National Bureau of Investigation-7 tungod sa giingong pagpamaligya og peke nga “Robust” dietary supplement for men dinhi sa dakbayan sa Sugbo ug sa Lapu-Lapu.

Matud ni supervising agent Atty. Rennan Augustus Oliva nga ang ronda gihimo pinasikad sa search warrant nga giisyu ni Regional Trial Court Judge Ramon Daomilas, Jr., sa Branch 11 human napositibo ang report nga namaligya sila og mini nga sex enhancing product sa gihimong  test buy operation.

Ang mga establisamento mao ang De Oro Therapeutic CTR and General Merchandise diha sa Lower Ground Level  sa usa ka mall sa North Reclamation Area, Cebu City gipanag-iya ni Roa Manuel Ayson;  888 International Beauty Focus Collection Inc. sa Barangay Sto. Niño, Cebu City nga gipanag-iya ni Daisy Llagoso;  ug 888 International Beauty Focus Collection Inc. sa M.L. Quezon Hi-way Pajo, Lapu-Lapu City gipanag-iya ni Cornelia Dayday.

Matud ni Oliva nga niadtong Pebrero nakadawat ang ilang buhatan og reklamo gikan ni Noel Aguilar, HR Manager sa  ATC Healthcare Corporation nga maoy legal nga distributor sa maong sex enhancing product.

Matud pa ni Aguilar nga sayon ra mahibaw-an ang peke nga Robust tungod  kay ang peke walay front line security sticker nga makita sa packaging ug walay security sticker nga makita sa blister ug walay ATC logo.

Ang peke nga tambal dali ra mabali gamit ang kamot samtang ang tinuod dili. Ang color sa peke nga Robust dalag samtang ang tinuod may pagka-abuhon nga tsokolate.

Mipahimangno si Aguilar nga ang peke makadaot sa motumar niini tungod kay duna kini sagol nga masilya nga makadaot sa atay.

Si Regional Director Atty. Ricardo Diaz sa NBI-7 nagkanayon nga padayon pa ang ilang imbestigasyon sa maong kaso. Ang mga tindera matud pa wa masayod nga peke ang ilang baligya.

Atol sa pagronda,  nasakmit sa NBI ang 50 ka karton nga pekeng  Robust. Ang orihinal niini nagkantidad og P100 ngadto sa P110 apan ang mga peke gibaligya lang og P90 ngadto sa P100.

 Kasong paglapas sa Section 155 ug 168 in relation to Section 170 sa Republic Act 8293  o Intellectual Property Code  ang ipasaka batok sa mga subject sa maong warrants. (BANAT NEWS)