Syringe alang sa mga adik gisupak
CEBU, Philippines – Supak ang hepe sa Regional Intelligence Division, Senior Supt. Paul Labra, sa lakang sa ubang sektor nga panghatagan og syringe ang mga adik sa Kamagayan, dakbayan sa Sugbo.
Kini tungod kay daw naghaylo kini sa mga adik nga mogamit og ilegal nga drugas. Matud ni Labra nga maayo ang tumong aron dili mokatap ang mga sakit sama sa Acquired Immune Deficiency Syndrome (AIDS).
Apan sumala pa niya nga ang pagpanghatag niini makapukan sa tumong sa kapolisan nga sumpoon ang ilegal nga drugas.
Samtang si Senior Superintendent Conrad Capa, officer-in-charge sa Cebu City Police Office, niingon nga dili na kinahanglan nga hatagan og syringe ang mga adik sa Kamagayan.
Kini tungod kay daghang mga syringes ang nasakmit nila sa labing ulahi’ng ronda sa lugar. Dugang ni Capa nga ang namaligya og nubain may pakapin na nga syringe nga mura’g apil na sa package sa pagbaligya. – /GMR) (BANAT NEWS)
- Latest
