Abogada miduso og dugang ebidensya

CEBU, Philippines – Dugang ebidensya ang giduso ni Atty. Jiecel Tiu sa kasong frustrated murder batok sa asawa ni Ronda Vice Mayor Atty. Jonnah John Ungab sa piskalya kagahapon.

Si state prosecutor Liceria Rabillas midawat sa supplemental affidavit, medical certificate, affidavit of arrest, ug pictures sa Toyota Vios sedan nga giingong gibunalan ni Pearl Ungab.

Matud ni Tiu nga daghan ang nakasaksi sa krimen apan nagdumili pagluwat og affidavit kay nahadlok sa pamilyang Ungab.

Usa ka Anecito Limpag, usa ka Cebu City Metro Aide, nagkanayon nga samtang naa siya gawas sa opisina sa CITOM sa Barangay Ramos, nakakita siya og puwa nga sakyanan nga gibundol sa laing sakyanan.

Sunod niyang nakita ang pagpamunal sa bat diha sa sakyanan ug sa biktima.

Matud pa ni Tiu kun dili pa tungod sa traffic enforcer nga mitabang kaniya  grabe pa ang iyang mahiaguman. Si Tiu nakabaton og bun-og sa ulo, luyo sa iyang wala nga dunggan ug abaga.

Ang suspek kasamtangang gi- hospital arrest sa Don Vicente Sotto Memorial Medical Center tungod kay mabdos kini ug nagdugo.

Matud pa nga gipasiritan pa niini og pepper spray si Tiu  ug gisuwayan’g ligis sa sakyanan ni Tiu.

Gihimakak  sa suspek nga gibunalan niya og bat ang abogada ug selos ang hinungdan kay matud niya naglagot lang siya niini tungod sa pag-insulto kaniya.

Si Tiu sa report kagahapon sa GMA News Balitang Bisdak mihimakak nga duna silay relasyon sa bana sa suspek. Matud pa niya dili siya kabit ug nanawagan kang Atty. Ungab nga mopatim-aw aron klaruhon ang isyu.

Kauban si Ungab ug Tiu kaniadto sa law firm apan mipahawa ang naulahi sa miaging tuig.

Si Pearl matud pa nibalibad nga mapaubos sa preliminary investigation, ug resolbahon na kini ni Rabillas kun duna bay kapasikaran ang kaso. – /EIM) (BANAT NEWS)