Lending firm gitulis

CEBU, Philippines – Mokabat  sa P40 mil ug lima ka cellphones ang nahanaw sa Casa Blanca Lending Investors Corporation sa barangay Kasambagan, dakbayan sa Bogo nga gitulis sa armadong mga lalaki alas 7 pasado sa niaging gabii.

Si Senior Police Officer 4 Oswaldo Layson sa Bogo City Police Station niingon nga tulo ka wala hiilhi’ng lalaki ang nisulod sa maong buhatan ug nanion og armas dungan ang pagpahibalo’ng tulis.

Matud ni Layson nga maisogon nga gimando sa mga tulisan sa tanang kawani ang paghapa sa sawog ug  gipasidan-an nga dili mohangad sa pagtan-aw sa ilang mga panagway.

Ang branch encoder nga si Evangiline Tulod Maitom, ang gibira sa usa sa mga tulisan ug gidala sa nahimutangan sa vault ug gimandoan sa pag-abli.

Human makuha ang kuwarta, gipanguhaan sa ilang cellphone ang mga kawani ug gimandoan sila’ng tanan sa pagsulod sa comfort room ug gikandaduhan.

Ila nalang nadungog ang andar sa motorsiklo nga anam-anam nga nagpalayo.

Taudtaud nangayo og tabang ang mga kawani sa mga molupyo sa lugar kinsa nanawag og mga barangay tanod nga maoy nagtinabangay pag-abli kanila. – /GMR) (BANAT NEWS)