Women’s Month gibuksan

CEBU, Philippines – Gawas sa Fire Prevention Month, ang buwan sa Marso mao usab ang buwan pag-obserbar sa Women’s Month lukop nasud.

Dinhi sa dakbayan sa Sugbo ang mga nagkalain-laing organisasyon sa kababayen-an gikan sa 80 ka barangay sa siyudad nagtapok sa Plaza Sugbo atubangan sa Cebu City Hall. Diha sa selebrasyon sila si Konsehal Noel Wenceslao ug Konsehal Leah Japson.

Dunay kompetisyon nga gihimo diin naglumba sila og luto og budbod ug humba, kadtong pinakalami  og timpla maoy mananaog.

Si Japson mibutyag gusto nilang ipakita ang katakos sa kababayen-an ug ilang dakong papel sa pamilya isip tighatag sa panginahanglan.

Samtang ang migawas nga mananaog sa contest mao ang Barangay Sirao, Bulacao ug Banilad sa budbod category ug Barangay Toong, Sirao ug usa ka NGO sa humba category.

Ang konsehal miingon usab nga mosuporta siya sa balaudnon ni Senador Antonio Trillanes nga Senate Bill 2661 nga nagtinguhang himuong upat ka buwan ang maternity leave benefits sa kababayen-an gikan sa duha ka buwan.

Alang kang Japson, dili dali ang recovery ug pag-adjust sa mga inahan gikan sa pagpanganak ug kuwang ra ang duha ka buwan. – /EIM) (BANAT NEWS)