Hot meat gibaligya
CEBU, Philippines — Gi-imbestigahan sa kagamhanan sa dakbayan sa Sugbo ang usa ka pribadong kompanya human nga gireklamo nga namaligya og karne nga dili na angay kan-on.
Sa investigation report ni Manuel Cañeda, Sanitation Inspector sa City Health Department gihimo human sa reklamo gikan sa Barangay Inayawan diin nagbase ang maong kompanya.
Gipugngan una sa Banat News ang pangalan sa kompanya hangtod makuhaan kini og habig.
Matud ni Cañeda sa iyang report nga namaligya matud pa ang maong kompanya og mga “condemned meat” nga angay na untang ilabay.
Usa ka van ang nakit-an nga gipanag-iya sa maong pribadong kompanya nga naka-park sa White Road Inayawan sa miaging Oktubre 24, 2014 nga namaligya og “condemned meat” sa publiko ug sa mga kan-anan nga duol niini. Matud sa report nga ang maong insidente giimbestigahan ni Inayawan Barangay Kapitan Lutherlee Ignacio-Soon.
Ang City Health Department (CHD) nihimo og duha ka inspeksyon sa maong kompanya. Niadtong Enero 14, 2015, nasakpan sa CHD nga walay business permit ug walay sanitary permit ang maong kompanya ug wala ‘sab kini certificate of employment.
Gihatagan og kinse ka adlaw ang kompanya pagkompleto sa ilang mga rekisitos. Apan sa pagbalik sa inspectors niadtong Pebrero 3, 2015, aduna na silay temporary nga business permit apan nagproseso pa sila sa sanitary permit.
Apan wa makompleto ang ilang koral ug walay atop ang ilang storage area.
Wala sab silay operating permit alang sa waste disposal facility nga aprobado sa Department of Health-7. Gisuwayan sa Banat News pagkuha og ilang habig ang kompanya apan wa nitubag sa ilang telepono. (BANAT NEWS)
- Latest
