Kapitolyo manghatag cash aid sa mga seniors
CEBU, Philippines - Gikatakda sunod buwan nga mahatag na sa Kapitolyo ang pinansiyal nga hinabang sa mga senior citizens.
Matud ni Bokal Raul Alcoseba, chairman sa committee on senior citizens sa hunta probinsiyal, nga mag-agad siya og pila ang kantidad nga mahatag sa lungsod aron mao sab ang kantidad nga ilang ihatag isip tugbang.
Giawhag ni Alcoseba ang mga senior citizens sa probinsiya nga magparehistro sa ilang barangay o munisipyo aron maapil sa benepisyo.
Matud ni Alcoseba nga dili kinahanglan nga registered voter ang usa ka senior citizen aron makaparehistro ug makakuha og senior citizen card.
Sa pagkakaron ang buhatan ni Alcoseba wala pa’y listahan sa tukma’ng gidaghanon sa mga senior citizens sa probinsiya sanglit nihatag pa sila og higayun sa kalungsuran sa pagpangrehistro sa mga senior citizens.
Matud ni Alcoseba nga kung makompirmar na ang gidaghanon sa mga senior citizens, mopasar sila og supplemental budget alang sa programa.
Sa pagkakaron ang kagamhanan sa probinsiya padayun sa programa nga “Halad ni Lolo ug Lola” diin ang mga senior citizen sa kalungsuran makadawat og gasa sama sa bugas. (Brenda D. Batuto/GMR)(BANAT NEWS)
- Latest
