Mayor naalarma sa pagpamusil duol sa police station

CEBU, Philippines - Gimandoan ni Mayor Paz Radaza ang kapolisan sa dakbayan sa Lapu-Lapu sa pag-doble sa ilang paningkamot sa pagsanta sa kriminalidad.

Kini atol sa iyang pagpakigtagbo kang Lapu-Lapu City Police Office Director Armando Radoc human sa pagpusil patay sa usa ka negosyante duol sa police station.

Matud ni Radaza nga angay ma-alarma ang kapolisan sa nahitabo duol sa buhatan sa Special Weapon and Tactics (SWAT).

Gimando ni Radaza kang Radoc ang police visibility lakip na usab ang pagpatrolya sa kapolisan.

Si Radoc sa iyang bahin niingon nga dihang nahitabo ang insidente dali nga niresponde ang iyang mga sakop apan wala nadakpi ang mga suspek kinsa paspas nga nakasibat.

Naghimo na og follow-up operation ang kapolisan labot sa nahitabo’ng pagpamusil sa niaging semana. (Decemay P. Padilla/GMR)(BANAT NEWS)