Duha nasakmita’g P100 mil nga drugas
CEBU, Philippines - Nikabat sa P100 mil ang kantidad sa nasakmit nga drugas samtang duha ka tawo nga gidudahang tigpayuhot ang nasikop sa managlahi’ng operasyon nga gilusad sa kapolisan sa dakbayan sa Sugbo kagahapo’ng adlawa.
Usa ka search warrant ang gisilbi sa kapolisan sa Waterfront Police Station batok sa gihulagway nga level 3 drug pusher sa sitio Looban, Villagonzalo II, Tejero. Ang dinakpan naila nga si Herodes Dela Cruz, 28, ulitawo ug nagpuyo sa maong lugar.
Nakuha sulod sa balay sa suspek ang usa ka medium size, duha ka tag-as nga pakete ug usa ka gamay nga pakete sa gituohang drugas nga gibanabana nga mokantidad og P30,000.
Gawas sa mga drugas nakuha sab ang 16 ka bala sa 9mm pistol.
Samtang ang mga sakop sa City Anti-Illegal Drugs Special Operations Task Force sa CCPO ang nakasikop sa usa ka Nestor Rosal, 52, sa buy-bust operation sa Purok 4, Kamputhaw alas 10:40 sa nakalabay nga gabii.
Narekober ang usa ka medium ug siyam ka gagmay nga pakete sa gituohang drugas nga mokantidad og P70,000.
Pasakaan sa tukma’ng kaso ang mga dinakpan. (Jojo C. Ugdol/GMR)(BANAT NEWS)
- Latest
