Shelter assistance ipasabot sa DSWD

CEBU, Philippines - Makigtagbo ang kadagkuan sa Department of Social Welfare and Development-7 sa mga mayor sa mga lungsod nga apektado sa bagyo’ng Yolanda karong Marso 10.

Kini aron ipasabot ang guidelines sa pagpanghatag sa emergency shelter assistance (ESA) nga gireklamo sa mga residente nga apektado sa bagyo.

Human sa bagyo gilista ang tanan nga nagub-an sa ilang panimalay.

Apan ang DSWD nipagawas og guidelines nga kadto’ng pamilya nga may binuwan nga kita nga sobra sa P15 mil ug kadto’ng namuyo sa danger zones dili makadawat sa maong hinabang.

Motambong sa tigum ang mga budget officers ug kadagkuan sa Commission on Audit aron matubag ang mga pangutana. Ang P1.9 bilyones nga pundo anaa na sa DSWD-7 apan ang nikuha na sa ilang tseke ang mga lungsod pa sa Sta. Fe, Madridejos ug Daanbantayan.

Wala pa sab masusi sa DSWD kun ang maong mga lungsod nisunod ba sa guidelines nga ilang gipagawas.  (BANAT NEWS)