Lehitimo ang operasyon–Hepe

CEBU, Philippines - Gibarogan sa hepe sa kapulisan sa lungsod sa Argao nga lehitimo nga operasyon ang ilang operasyon batok ilegal nga drugas nga miresulta sa pagkamatay sa usa ka gidudahang tigpayuhot og drugas sa Barangay Talo-ot sa maong lungsod niadtong nakalabay nga adlaw.

Si Senior Inspector Alejandro Batobalonos sa pakighinabi sa Banat News miingon nga dunay naabot nga estorya sa ilang buhatan nga namasangil kanila nga gikulata ang suspetsado nga si Fritche Gecala una pa kini gipusil.

Apan gipasabot ni Batobalonos nga lisod kaayo nga mahitabo ang maong pasangil kay pinusilay dayon ang nahitabo human giunhan sila pagpusil sa suspek pagkasayod nga ilang iimplimentar ang search warrant sa balay sa maong suspetsado.

“Unsaon man namo pagkulata intawon nga gipamusil naman mi niya. Igo rami mibalos kay wala man siya nakaigo,” matud pa ni Batobalonos.

Sumala pa niya, andam siya nga moatubang kung dunay mopasaka og reklamo batok kanila nunot na sa maong hitabo.

Midugang kini nga daghang nalipay nga silingan sa suspek human sa pagkapatay niini tungod kay gikahadlokan nila si Gecala.

“Kulang na lang mag fiesta ang mga tawo diri sa kalipay nga nakuha namo siya, daghan na kaayo og reklamo ani niya. Hasta mga silingan nga barangay nagpasalamat sa amoa, at last nakuha ra g’yud daw namo,” sumala pa ni Batobalonos.

Si Gecala na ang ikaunom nga napatay sa kapulisan lukop rehiyon sa kampanya batok ilegal nga drugas niini lang tuiga.

Sa Cebu Provincial Police Office dunay natala nga upat ka mga tawo ang namatay sa ilang 139 ka mga drug raids, samtang ang Regional Anti-Illegal Drugs Special Operations Group-7 nakapatay og usa sa tulo ka mga operasyon. (BANAT NEWS)