Kapin P150mil nga drugas nasakmit
CEBU, Philippines - Usa ka babaye nga gipasanginlang nag-operate og drug den ug tulo ka mga tawo nga giingong nanuyop ang gisikop sa mga sakop sa Philippine Drug Enforcement Agency (PDEA)-7 atol sa buy-bust operation niadtong Miyerkules sa gabii diha sa Barangay Bulacao dakbayan sa Talisay.
Si Alice Fe “Isay” Dionson, 37, taga Cordova, nadakpan human mibaligya og usa ka gamay sa paketeng shabu bugti sa P200.
Apil sa nasikop sila si Rogel Siarot, 40, Gaudioso Dacayaha, 29, ug Reynold Reponoya, 26, nga matud pa naaktohan sulod sa maong drug den.
Matud pa ni Investigation Agent 3 Levi Valmoria, tigpamaba sa PDEA-7, niadto pang milabay nga tuig gipanid-an si Dionson. Nakaikyas kini sa ilang operasyon niadtong Disyembre.
Nasakmit gikan kaniya ang 261 ka gagmay nga pakete sa gituohang shabu nga nagkantidad og kapin P50,000 ug ang buy-bust money nga P200.
Apan ang dinakpan hugtanong nihimakak sa pasangil nga namaligya kini og drugas, giangkon hinuon niya nga siya ang nagbantay sa maong drug den.
Sa laing operasyon nga gihimo sa City Intelligence Branch sa Cebu City Police Office, usa ka Ramil Generalao ang nadakpan sa buy-bust operation diha sa Sitio San Miguel, Barangay Tisa ning dakbayan sa Sugbo.Matud pa ni Senior Police Officer 2 Artesio Monroid nga nahinabi sa Banat News, usa ka level 3 drug pusher si Generalao.
Napalitan siya og balor P300 nga shabu (usa ka pakete) hinungdan nga kini gidakop.
Dugang nakuha gikan kaniya ang mga pinutos nga shabu nga gibanabanang kapin sa P100 mil ang kantidad. (BANAT NEWS)
- Latest
