7 ra ka konsehal nitambong sa Charter Day
CEBU, Philippines – Pito lang sa 16 ka konsehal sa dakbayan sa Sugbo ang niapil sa ika-78 nga Charter Day kagahapon sa buntag sa Plaza Sugbo.
Sila si Konsehal Gerardo Carillo, Alvin Dizon, Nida Cabrera, Roberto Cabarrubias, Nendell Hanz Abella, Noel Wenceslao ug Philip Zafra ang gipasalamatan ni Mayor Michael Rama nga nitungha nga wala gihunahuna ang politika.
Ang mga konsehal nga wala nanambong mao sila si Konsehal Margarita Osmeña, Sisinio Andales, Eugenio Gabuya, Leah Japson, Nestor Archival ug Alvin Arcilla nga mga sakop sa Bando Osmeña Pundok Kauswagan (BOPK).
Kadaghanan nila niingon nga dili pamolitika ang hinungdan sa ilang wala pagtambong.
Matud ni Osmeña nga aduna siya’y appointment sa iyang doktor mao’ng wala siya katungha ug si Andales adunay giasikaso sa airport kay naabot ang iyang anak.
Wala sab makit-i sila’ng konsehal Mary Ann de Los Santos, James Cuenco, David Tumulak ug Richie Osmeña sa maong selebrasyon.
Sa maong selebrasyon kompleto ang pamilya’ng Rama nga nihalad og buwak sa monumento ni Don Vicente Rama kinsa mao’y amahan sa pagkahimo’ng siyudad sa Sugbo. Gihagit sa mayor ang tanang nitambong sa selebrasyon nga angay buhaton sa tanan ang tinud-anay nga serbisyo. – /GMR) (BANAT NEWS)
- Latest
