Task group gitukod

CEBU, Philippines – Usa ka task group ang gi-umol aron maoy motutok sa kaso sa tulo ka mga langyaw nga gipamusil diin usa ang patay sud sa usa ka fastfood chain sa Barangay Tabunok dakbayan sa Talisay.

Ang maong task group gilangkuban sa Regional Intelligence Unit, Regional Special Operations Group-7, Regional Anti Illegal Drugs Special Operations Task Group-7, Criminal Investigation and Detection Group-7, Provincial Intelligence Branch ug Talisay City Police Office.

Kini nga task group pangulohan sa deputy chief for operations sa Police Regional Office-7 ug Officer in-charge sa Cebu City Police Office, Senior Superintendent Conrad Capa nga magsilbing task force commander.

Ang maong task group gitukod aron mapadali ang pagtumbok, pagsikop sa mga responsable sa pagpamusil sa mga langyaw diin tulo na ang nasikop apan duna pa silay laing gipangita nga nalambigit sa maong kremin.

Kagahapong adlawa usa ka case conference ang gihimo uban sa mga sakop sa maong task group didto sa buhatan sa PRO-7.

Matud pa sa hepe  sa PRO-7, Chief Supt, Prudencio Tom Bañas nga nakuha na ang kadaghanan sa responsable sa maong krimen apan duna pa’y laing duha ka mga tawo ang gipangita nga kinahanglang dakpon. Buot ni Bañas nga pabutangan og polis ang lugar nga nahitaboan gumikan kay daghang mga tawo sa lugar apan walay polis nga nakadestino kaniadto pa sa maong dapit.

Giawhag usab ni Bañas ang mga langyaw nga di mahadlok tungod sa maong hitabo tungod kay “isolated case” lang kini.

Ang pinakaulahing nasikop sa CIDG-7 mao si Roger Cal, 40, diha sa iyang balay sa Ruiz Compound, Tabunok dakbayan sa Talisay niadtong Domingo.

Una nang nasikop sa managlahing operasyon sa Talisay City Police ug Regional Special Operations Group-7 ang laing duha ka mga suspek nga sila si Allan Velos, 40 ug Ricci Ramirez, 21 nga pulos ra sab nagpuyo sa dakbayan sa Talisay. Si Gobernador Hilario Davide III mihangop sa pagkasikop sa pipila ka suspek, apan miawhag sa kapolisan nga palig-unon ang seguridad sa pangpublikong mga lugar.

Samtang usa ka resolusyon ang gipasar kagahapon sa Hunta Probinsyal nga naghangop sa daling aksyon sa kapolisan. – /EIM) (BANAT NEWS)