Bayot sikop, 11 apil duha ka bata naluwas

CEBU, Philippines – Usa ka mahuyang ang gidakop tungod sa pasangil nga iyang gibugaw ang duha ka mga minor de edad  ngadto sa police asset  diha sa usa ka kan-anan sa usa ka mall sa Mactan, Barangay Pusok sa dakbayan sa Lapu-Lapu.

Ang dinakpan naila nga si Ryan Danganon Opong, alyas Leyan, 21, lumad nga taga Jose Abad Santos, Davao Del Sur ug temporaryo nga nagpuyo sa barangay Agus dakbayan sa Lapu-Lapu.

Onse ka mga babaye ang gipang-rescue sa kapulisan ug nasuta nga ang duha niini mga minor de edad nga sila si alyas Bexmae, 16, ug Apple 13,  samtang ang ubang mga babaye nag edad 18 hangtod 25-anyos.

Matud pa ni Senior Inspector Maria Theresa Macatangay ang hepe sa Regional Anti Human Trafficking Task Force-7 tulo ka adlaw nga ilang gisundan ang kalihokan ni Opong hangtod nga kini gikontak kung makahatag ba og mga babaye.

Sumala pa ni Macatangay nga mokantidad sa P4,000 ang bayad nga gipangayo sa maong bugaw bugti sa mga babaye, apan atol sa ilang pagkita diretso nila kining gisikop. Atol sa maong operasyon didto ang representante sa Department of Social Welfare and Development ug mga sakop sa International Justice Mission.

Sa pakighinabi sa Banat News sa suspetsado kini miangkon nga wala siya masayod nga polis ang iyang kasabot nga mokuha og mga babaye, wa usab siya mahibalo nga mapriso diay siya niini nga trabaho.

Sumala pa niya wa siya’y nahuman bisan elementarya mao nga nanarbaho na lang siya sa usa ka kan-anan aron makatabang sa iyang pamilya. Apan ang hepe sa RAHTTF7 miingon nga dili basihan nga kung wala kini nahibalo sa balaod pwede na kini nga dili pasakaan og kaso.

Kasong paglapas sa anti-human trafficking ang  ipasaka batok sa suspetsado nga wala’y piyansiya nga girekomendar. – /EIM) (BANAT NEWS)