School bus driver nawad-a’g trabaho tungod sa 'selfie'

CEBU, Philippines – Usa ka babayeng drayber og school bus didto sa Ohio ang gipalagpot sa iyang trabaho gumikan sa pag-post niini og 'selfie' sa Facebook diin siya makita nga mura’g nag-inom og beer samtang nagkupot sa manibela sa bus.

Sa hulagway, makita ang ngabil sa maong drayber sa Princeton City School District nga duol kaayo sa usa ka botelyang beer.

Nakahimo kini og dakong kasikas sa ilang dapit ilabi na ngadto sa mga ginikanan ug mga opisyales sa tunghaan nga nakakita sa maong  FB post.

Wa hinuon gibutyag ang ngalan sa drayber, apan gikataho nga gipapahawa gilayon kini sa iyang employer nga mao ang First Student Transportation.

Sa opisyal niining pamahayag, ang FST nasagmuyo og maayo sa gibuhat sa ilang drayber nga wala mahisubay sa polisiya ug patakaran sa ilang kumpanya.

Base sa imbestigasyon nga ilang gihimo, nasuta nga wala diay maablihi ang botelya sa beer, walay mga estudyante sud sa bus, ug ang maong hulagway gikuha samtang off-duty ang hintungdan nga drayber.

Apan bisan pa man niini, pipila ka mga ginikanan sama ni Sadie Leporati ang miinsister nga dili na g’yud angayan nga pa-draybon og balik ang nahisgutang drayber kay dili sulondon ang iyang nahimo ilabi na kay mga bata ang iyang giserbisyoan. (www.huffingtonpost.com/EIM) (BANAT NEWS)