Pusher ‘murag hangin’ nakaeskapo
CEBU, Philippines – Nasakmit sa Balamban Police ang daghang pinaketeng drugas nga mikantidad og P110,000 apan nakaeskapo ang suspetsado nga drug pusher atol sa gihimo nga buy-bust operation niadtong nakalabay nga kaadlawon sa barangay Pondol lungsod sa Balamban.
Ang nakaeskapo mao si Rex Baguio, nagpuyo sa maong lugar human nakabantay nga polis ang iyang gibaligyaan og drugas.
Matud pa ni Senior Police Officer 2 Ranielito Villarino, chief investigator sa Balamban Police nga miagi sa likod sa balay ang suspetsado ug nakasibat.
Gamit ang P500 nga buy-bust money nakatunol na unta og shabu ang suspek apan nakabantay nga polis ang iyang kaatubang ug dali kining mibalik sa iyang lawak dala ang buy-bust money dayong sibat.
Duna untay mga polis nga nakaplastar sa likod sa balay apan nalutsan gihapon kini sa suspek nga nakalugnot gikan kanila.
“Grabe modala og lugnot, didto mi sa luyo sa iyang balay, maayo kaayo modala og abli sa pultahan wala’y kanaas…morag hangin, niagi sa among kilid,” matud pa.
Gawas sa drugas nasakmit ‘sab sa kapulisan sulod sa balay ni Baguio ang mga drug paraphernalia ug unom ka bala sa 12 gauge shotgun.
Bisan pa man og nakaeskapo pasakaan gihapon siya og kaso sa pagbaligya ug paghupot ug drugas. – /EIM) (BANAT NEWS)
- Latest
