“Level 2 pusher” sa Toledo sikop
CEBU, Philippines – Nasikop ang usa ka gituohang level 2 drug pusher sa gipahigayun nga buy-bust operation sa barangay Lutopan, dakbayan sa Toledo.
Ang dinakpan mao si Gerardo Gemida, 26-anyos, nagpuyo sa nahisgutang lugar ug usa ka notadong drug pusher.
Si Police Inspector Jovito Labra ug kaubanan sa Toledo City Police Station ang nisikop sa suspek sa gipahigayun nga operasyon.
Gamit ang P200 nga buy-bust money, usa ka wala nagpaila nga polis ang nipalit sa suspek ug sa dihang nakompirmar, dali’ng gisikop ang suspek.
Nakuha gikan sa suspek ang duha ka dagku nga putos sa gituohang shabu, duha ka medium ug adunay unom ka putos nga gagmay ug gibana-bana nga mokabat sa P15 mil ang kantidad.
Dugay na nga gipanid-an ang ilegal nga kalihukan sa suspek.
Gitanggong na sa Toledo City detention cell ug gikatakda’ng pasakaan og tukma’ng kaso karong adlawa. – /GMR) (BANAT NEWS)
- Latest
