Nag-wild gidunggab sa ugangan
CEBU, Philippines – Nadunggaban sa iyang liog ang usa ka tawo nga kalit lang nag-wild tungod sa hilabihan nga kahubog alas 3 pasado ang takna sa niaging kadlawon sa Purok Tamarin, Umapad, dakbayan sa Mandaue.
Ang biktima nga grabe ang kahimtang mao si William Latasan Villamor, 25-anyos, taga Labogon sa maong dakbayan ug ang suspek mao si Simplicio Fernandez, 47-anyos, nagpuyo sa maong dapit.
Si Senior Police Officer 2 Juan Calamba sa Presinto 5 sa Mandaue City Police Office (MCPO) niingon nga nakatugaw sa nangatulog nga mga silingan ang pag-wild ni Villamor.
Ang ugangan nga lalaki nga si Fernandez nga nakamata sa kasaba sa tinagoktok sa atop sa ilang panimalay nga gibato ni Villamor ang nagdali sa pagbangon ug nigawas sa ilang lawak.
Gibadlong ni Fernandez si Villamor apan nasuko kini hinungdan sa pagtumaw sa mainiton nga panaglalis.
Matud ni Calamba nga wala na makapugong sa gihimo sa iyang umagad ang ugangan hinungdan sa paggawas niini sa ilang panimalay nga nagdala og kutsilyo ug dayun dunggab sa bukton, bukobuko ug liog. Si Calamba niingon nga ang suspek ang dali nga nitahan sa kapolisan. – /GMR) (BANAT NEWS)
- Latest
