Suspetsado sa panigbas nadakpan
CEBU, Philippines - Nasakmit sa kapolisan ang shabu ug kutsilyo gikan sa usa ka tawo nga suspetsado sa pagpanigbas sa iyang ugangan nga lalaki nga ilang nadakpan didto sa Barangay Lamac, Consolacion kaniadto’ng Biyernes sa buntag.
Si PO1 Arnold Caputolan sa Consolacion Police Station miila sa dinakpan nga mao si Ronie Tantuela, 28, nga suspetsado sa pagpanigbas ni Artemio Legaspi, 52, nga anaa pa sa kritikal nga kahimtang sa tambalanan.
Matud ni PO1 Caputolan nga nahitabo ang pagpanigbas niadto’ng gabii sa Pebrero 18 ug nakasibat ang suspek maoy hinungdan nga wala dayon kini madakpi.
Sa paglabay sa tulo ka adlaw human sa pagpanigbas ang suspetsado nga adunay gidala nga kutsilyo mipauli sa ilang panimalay ug nanghagis na usab tungod sa grabe’ng kahubog.
Ang mga silingan nga gibati og kalisang dali nga nangayo’g tabang sa mga tanod.
Ang mga tanod wala moatraka ug nangayo’g tabang sa mga polis kay armado ang suspetsado.
Sila si PO1 Norberto Cejas, PO3 Arthur Ariate, PO1 Raymond Levi ug PO1 Retchie Guilleran sa Liloan Police Station maoy midakop ni Tantuela nga gitanggong na sa bilanggoan. (BANAT NEWS)
- Latest
