Hilutungan may solar power na

CEBU, Philippines - Gibutangan og 5,220 watts nga solar power system ang Hilutungan Elementary School nga usa ka isla sa lungsod sa Cordova nga problemado sa supply sa elektrisidad.

Ang maong solar panel adunay 18 ka panels nga may 290 watts matag usa.

Ang design sa solar panel alang sa suga sa tibuok tunghaan ug mahimo na usab nga magamit ang napulo ka computer sa Hilutungan Elementary School.

Nasayran ang solar power system proyekto sa SunEdison nga gipangulohan sa bana ni Cristina Osmeña, anak ni anhing senador Sergio “Serging” Osmeña, nga nagbase sa Amerika.

Ang kompanya ni Konsehal Nestor Archival sa dakbayan sa Sugbo nga ilado sa solar products ang nihimo sa design ug niinstalar niini.

Gipasabot ni Archival nga environment-friendly ang maong proyekto tungod kay dili kini mobuga og aso ug ang tinubdan gikan sa adlaw.

Si Cordova Mayor Adelino Sitoy niasoy nga daku og tabang ang maong proyekto ilabi na sa mga tinun-an tungod kay dili na limitado ang oras sa ilang paggamit sa kuryente.

Matud sa mayor nga kaniadto generator set lang ang gigamit sa mga taga Hilutungan sulod sa upat ka oras matag adlaw.

Ang principal sa Hilutungan Elementary School nga si Marites Padayao mapasalamaton sa nihatag sa solar panel. Tungod niini mapalambo pa nila ang computer literacy sa mga tinun-an tungod kay magamit na ang mga computers. (Decemay P. Padilla/GMR)(BANAT NEWS)