Usa patay, 3 angol sa bangga

CEBU, Philippines - Patay ang usa ka babaye human nabanggaan sa usa ka kotse nga gimaneho sa usa ka 13-anyos nga lalaki didto sa Poblacion lungsod sa Dalaguete niadtong alas 4:45 sa nakalabay nga hapon.

Ang biktima naila nga si Vevencia Valeriano, taga Tinaan sa dakbayan sa Naga, samtang ang drayber sa Honda CRV  usa ka menor ug nagpuyo sa Poblacion sa maong lungsod.

Matud pa ni Police Officer 3 Noeh Rosales ang desk officer sa Dalaguete Police nga nahinabi sa Banat News, ang bana sa biktima mibutyag nga naabot sa maong lugar ang biktima kay duna kini problema sa pangisip.

Dali pa unta nga gidala sa Julio Rosales Memorial Hospital ang biktima apan nakabsan kini sa iyang kinabuhi.

Hinuon gipasabot ni Rosales nga nagkasabot ang pamilya sa batan-on ug sa biktima alang sa galastuhan  sa pagpalubong sa namatay.

Samtang sa lungsod sa Moalboal, angol ang inahan ug duha niya ka anak human nasaghiran ang ilang gisakyan nga motorsiklo sa usa gihapon ka kotse nga Honda CRV nga gimaneho sa usa ka French national sa Poblacion West.

Ang mga biktima naila nga sila si Luisita Jadausan, 50, inahan ug ang iyang duha ka mga anak nga sila si Glee Jadausan, 16, kinsa maoy nagmaneho  sa motorsiklo ug Jasmin Jadausan, grade 5 pupil pulos taga Tomonoy, Moalboal.

Samtang nakabangga nga langyaw naila nga si Julien Bernard Samaha, 32, nga kasamtangan nga nagpuyo sa usa ka lodge sa maong lungsod.

Ang mga biktima nalandig karon sa Vicente Sotto Memorial Medical Center  samtang ang langyaw gikatahong mipasalig nga maoy moabaga sa gastos sa tambalanan. (Jojo C. Ugdol/EIM)(BANAT NEWS)